O vindeiro sábado 27 de setembro celébrase no Concello de Ribeira a XXVI Carreira Popular Santa Uxía – II Memorial Miguel Ruiz. Ante este importante evento deportivo a Policía Local de Ribeira está a preparar un dispositivo organizativo de seguridade destinado a garantir o bo desenvolvemento da cita, achegando unha serie de cambios de mobilidade que cómpre ter en conta a cidadanía.
A carreira, como lembraremos, terá a súa saída dende o peirao comercial e durante 10 quilómetros, os participantes percorrerán a avenida do Malecón, o parque García Bayón, o paseo das Carolinas e o paseo peonil de Coroso, para dar volta e facendo o recorrido á inversa, finalizar no punto de saída.
A Policía Local de Ribeira pechará ao tráfico todas estas vías para garantir a seguridade do evento, establecendo alternativas á circulación, para “aliviar na medida do posíbel as molestias ás persoas condutoras”.
Os axentes sinalan que será establecida unha zona de estacionamento prohibido, para facilitar o paso dos corredores, na mediana da avenida do Malecón (zona azul) e ao longo do resto do percorrido os vehículos estacionados non poderán emprender a marcha ata a finalización da carreira.
En canto ao transporte público, dende as 15:00 horas, habilitarase unha parada de bus no entronque da rúa de Galicia coa rúa da Barreira, mentres que os taxis poderán collerse diante da carpa multiusos da rúa Canarias.
