Este venres 26 de setembro formalizarase en Rianxo o acto de apertura da exposición Castelao a través da miña mirada do rianxeiro Frank Farrapos. O acto será ás 20.00 horas. A Área de Cultura do Concello informou que a exposición estará dispoñíbel no Auditorio Municipal de Rianxo ata o sábado 18 de outubro.
O autor rianxeiro F.F. (Frank Farrapos), artista alternativo, regresa á sala de exposicións do Auditorio de Rianxo para mostrar a súa humilde homenaxe a Castelao e a parte da súa obra Cousas da vida.
Levando estas pezas narrativas ao seu terreo e saíndo da súa liña de confort, reinterpreta algunhas das obras, enchendo de cor e dando vida aos fondos das mesmas.
F. Farrapos Otero traballa con diferentes técnicas de pintura, movéndose coma peixe na auga cos materiais reciclados, que constitúen o seu selo de identidade. De formación autodidacta, levou a cabo xa seis exposicións nas que mostra o seu estilo ecléctico, que abrangue diversas técnicas e inclúe instalacións artísticas.
A súa obra ten a particularidade de non estar á venda, algo que distingue ao artista e que lle dá liberdade para crear sen ataduras. Como el mesmo di: “Eu non vivo da arte, a arte vive en min”.
