Este martes 9 de setembro a brigada de parques e xardíns do Concello de Noia procedeu á poda de distintas árbores que invadían a estrada que une o núcleo da vila con Pontenafonso. Segundo informaron dende o Goberno local, as pólas deste tramo supoñían un obstáculo para o paso de vehículos, comprometendo a seguridade viaria e dificultando o paso do transporte público. O Concello agradeceu o traballo desenvolvido pola brigada de parques e xardíns, que inicia co novo curso unha tempada de traballo intenso en todas as parroquias do municipio. Dende o Consistorio informaron tamén da adquisición para a xestión municipal do tractor xestionado até o de agora pola empresa concesionaria, que será de gran utilidade para traballos de roza e limpeza.
