O vehículo foise da vía na circunvalación SC-20 e saíu despedido uns 200 metros despois do choque
Dous homes resultaron feridos graves nun accidente de tráfico rexistrado pasadas as seis da tarde deste domingo na rotonda da circunvalación SC-20, en Santiago de Compostela.
Por causas que aínda se investigan, o vehículo no que viaxaban saíuse da vía, impactou contra un dos piares da ponte de San Lázaro e acabou desprazándose uns 200 metros.
Os bombeiros tiveron que excarcerar os dous ocupantes, de arredor de trinta anos, que foron trasladados ao Hospital Clínico Universitario en estado grave.
Ao lugar acudiron efectivos do 061, dos Bombeiros de Santiago e axentes da Policía Local para atender a emerxencia e garantir a seguridade viaria.
