O Concello de Boiro celebrou este mércores día 10 o pleno ordinario correspondente ao mes e setembro, que contou coa totalidade de membros da corporación (17). A sesión, que como de costume pode verse íntegra mediante a canle municipal de YouTube, saldouse con acordos de relevancia, como a aprobación da Conta Xeral 2024, a Relación de Postos de Traballo do Concello de Boiro (incluída a subida salarial das traballadoras e traballadores) cos votos a favor do PSOE e do PP ou unha moción de Boiro Novo para a mellora da rede de abastecemento de auga municipal (na moción reclámase a posta en marcha de medidas urxentes destinadas a evitar cortes ou perdas de presión na traída da auga por non ter unha rede de abastecemento axeitada).
Votacións da sesión:
1. Aprobación de actas das sesións anteriores.
2. Aprobación da Conta Xeral 2024 – aprobación con 9 votos a favor (PSOE) e 8 abstencións (PP, BNG e Boiro Novo).
3. Aprobación definitiva da Relación de Postos de Traballo do Concello de Boiro – aprobación con 14 votos a favor (PSOE e PP) e 3 abstencións (BNG e Boiro Novo).
4. Reposición á dispoñibilidade de créditos – aprobación con 9 votos a favor (PSOE), 5 votos en contra (PP) e 3 abstencións (BNG e Boiro Novo).
5. Modificación puntual do PGOM vial conexión DP-1107 e DP-1106 – aprobación con 10 votos a favor (PSOE e Boiro Novo), 2 votos en contra (BNG) e 5 abstencións (PP).
6. Aprobación POS+ adicional 2/2025 2ª fase – aprobación con 17 votos a favor (unanimidade).
7. Moción do grupo municipal Boiro Novo para a mellora da rede de abastecemento de auga municipal – aprobación por unanimidade (17 votos a favor). *a moción foi aprobada cunha emenda.
