A directora xeral de Persoas con Discapacidade da Xunta de Galicia, Begoña Abeijón, achegouse este martes 23 de setembro á sede boirense da asociación Amicos para interesarse polas obras de ampliación do Fogar Amicos. No centro inclusivo recibiuna a presidenta de Amicos, Esther Vidal, o director xeral da asociación, Xoán España, a responsábel da área de Persoas, e varios membros da xunta directiva e do equipo de Amicos.
Antes de dar comezo ao percorrido, Xoán España quixo destacar que “esta obra é un proxecto moi ambicioso no se inverteron moitos recursos; xa só a aportación da Consellería de Política Social ascende a 1,2 millóns de euros divididos en tres anualidades. Se todo vai ben contamos con que a mediados do ano estean rematadas as obras e deamos os primeiros pasos para iniciar o seu funcionamento”.
Tamén apuntou que “imos comprobar algúns dos proxectos financiados na convocatoria dos fondos IRPF, que nos permiten atender e prestar apoios a máis de oitenta persoas con discapacidade; dende programas tutelares a promoción de emprego, pasando por iniciativas de vida independente. Gracias tanto á Consellería como á Dirección xeral, porque isto para nós significa construír futuro e, ao mesmo tempo supón o seu recoñecemento e implicación co colectivo de persoas con discapacidade. Creo que este é o camiño correcto, que hai un bo traballo, sincero e continuo, e esta é a maneira de construír”. Unhas palabras de agradecemento ás que se uniu a presidenta da entidade.
Pola súa banda, Abeijón destacou que “este é como o noso segundo fogar. Dende a Xunta de Galicia cremos firmemente en Amicos, no seu traballo e na forma na que apoian ás persoas con discapacidade. Tamén en como traballan para integralas na comunidade, a través de proxectos de primeiro nivel, como os proxectos medioambientais de restauración de fondos mariños que coñecemos este verán, pero tamén os de fomento da vida independente. Por iso continuaremos a apoiar a Amicos, non só a nivel institucional senón tamén no económico, así como a outras entidades sociais de Galicia para que garantir que conten co apoio que necesitan”.
A continuación, o grupo visitou as obras de ampliación do Fogar Amicos, un paso co que se pretende adoptar un novo modelo de residencia, que continúe o camiño de fogar e mellorar o servizo. Esta ampliación aumentará a complexo residencial con trinta novas prazas, que se sumarán ás trinta e sete cas que xa conta o servizo. As obras deste novo módulo residencial xa se atopan na recta final, e prevese que poidan estar operativas de cara a 2026. Este albergará vinte e seis dormitorios individuais, cadanseu cun aseo adaptado, así como varios espazos comúns e os servizos necesarios para a máxima comodidade das persoas con discapacidade intelectual, en especial de aquelas con grandes necesidades de apoio.
O Fogar Amicos é un recurso de vivenda temporal ou permanente, dependendo das necesidades de cada persoa usuaria, para persoas con discapacidade intelectual que necesitan un apoio integral, continuado, persoal e multidisciplinar. Para iso un equipo de profesionais ofrecen unha atención individualizada as 24 horas do día durante os 365 días do ano. Dende Amicos decidiuse emprender esta ampliación “debido á alta demanda existente na zona dun servizo destas características”. Asemade, esta levouse a cabo grazas ao investimento financiado por FADEMGA e pola Consellería de Política Social e Igualdade da Xunta de Galicia dentro da convocatoria de subvencións destinadas á realización de programas de interese xeral para fins de carácter social, con cargo á asignación tributaria do 0,7 % do imposto sobre a renda das persoas físicas e do imposto de sociedades para o ano 2024.
Muse MusicArTherapy
A visita da directora xeral de Persoas con Discapacidade coincidiu cunha visita dos socios italianos do proxecto colaborativo MUSE MusicArTherapy, que busca mellorar as habilidades de comunicación dos profesionais dedicados á atención a persoas con necesidades de apoio, ao potenciar a empregabilidade de coidadores e coidadoras mediante formacións integrais que lles permitan adquirir as competencias básicas para a relación de coidado pedagóxico-terapéutico. Este céntrase na metodoloxía innovadora da MusicArTerapia na Globalidade das Linguaxes, método de Stefania Guerra Lisi desde 1970, que promove a Inclusión apoiada na prevención, educación, rehabilitación e actividades terapéuticas.
O encontro celébrase este martes e mércores, 23 e 24 de setembro, días que dedicarán a poñer en común o traballo realizado ata o momento. Asemade, emendaranse cuestións técnicas da iniciativa, e os participantes asistirán a dúas clases maxistrais sobre Introdución teórica e práctica á
disciplina GdL, impartida pola creadora e líder escolar Stefania Guerra Lisi (SGL).
Muse encadrase no marco do programa Erasmus+, a través do SEPIE. Está coordinado por Amicos e conta coa colaboración de Università Popolare di MusicArTerapia nella Globalità dei Linguagi – Metodo Stefania Guerra Lisi dal 1970 e a Cooperativa Umanista Mazra.
