Dende Protección Civil de Rianxo e dende a Policía Local informaron a primeira hora deste mércores 24 da desactivación do dispositivo de busca da persoa desaparecida en Rianxo, a veciña Josefina García, da que non se tiña noticia dende a tarde deste martes. Foi atopada por un veciño. Protección Civil de Rianxo agradeceu a veciños e aos compañeiros de Protección Civil de Pobra do Caramiñal e Catoria a implicación.
A alerta de desaparición foi dada polos seus familiares ao decatarse da súa ausencia no domicilio, situado na rúa Gudiños. Ante a falta de novas, ao redor das 21:00 horas púxose en marcha o protocolo de busca, coordinado pola Policía Local da vila.
O propio alcalde de Rianxo, Julián Bustelo, fixo un chamamento á cidadanía para que colaborase coa localización da veciña desaparecida, o chamando ao 112 ou ao número de contacto directo 609 862 222.
As tarefas de procura continuaron este mércores 24 de setembro, con participación de efectivos municipais e voluntariado, e finalmente o dispositivo acadou o éxito desexado dende o primeiro intre.
Josefina foi localizada sobre as 05:00 horas do día de hoxe e, segundo confirmou a Policía Local, atópase ben, aínda que foi trasladada ao Centro de Saúde de Rianxo para unha valoración en detalle.
