A empresa de inserción Arroupa Moda Re-, impulsada por Cáritas Diocesana de Santiago de Compostela, abre este luns 29 de setembro, en fase inicial, a súa nova tenda no número 12 da rúa Castelao de Vilagarcía. O espazo, de 100 metros cadrados, permitirá á cidadanía acceder a moda sostíbel e solidaria, con roupa, calzado e complementos para muller, home e neno.
O establecemento funcionará desde este luns en horario habitual: de luns a venres, de 10.30 a 13.30 e de 16.30 a 20.30 horas, e os sábados de 10.00 a 14.00 horas. Desde o primeiro día, as persoas interesadas poderán realizar as súas compras, que contribúen de maneira directa á sustentabilidade social e medioambiental, informaron dende Cáritas, engadindo que a tenda conta xa con dous contratos en inserción laboral, “reforzando así o compromiso de Arroupa Moda Re- coa xeración de emprego inclusivo para persoas en situación ou risco de exclusión”. Ademais, estableceuse unha colaboración cunha modista da zona, á que se derivará á clientela que precise arranxos nas pezas, creando así sinerxías co pequeno comercio local.
Ademais da venda ao público xeral, a tenda de Vilagarcía será tamén un recurso social ao servizo de Cáritas. A través de vales de compra, as persoas acompañadas pola entidade poderán acceder a roupa, calzado e complementos sen custo, garantindo así o dereito para vestirse con dignidade. Deste xeito, cada doazón de pezas e cada compra realizada en Arroupa Moda Re- transfórmase en apoio directo a quen máis o necesitan.
Inauguración oficial o 20 de outubro
A inauguración oficial da tenda será o vindeiro 20 de outubro nun acto que contará coa participación de altos representantes de Cáritas Española, de Cáritas Diocesana de Santiago e do equipo directivo da cooperativa Moda Re- a nivel nacional. Será entón cando se presente de forma oficial o alcance social e humano deste novo proxecto en Vilagarcía.
Con esta apertura, Arroupa Moda Re- continúa ampliando a súa rede de tendas en Galicia, achegando a moda sostíbel e solidaria a máis persoas e fomentando un consumo que coida do medio ambiente e xera oportunidades laborais para quen máis o necesitan.
Cáritas Diocesana de Santiago é unha entidade conformada polas Cáritas Interparroquiais da Coruña, Arousa, Carballo, Pontevedra e Santiago de Compostela e 317 Cáritas parroquiais.
Os seus programas alcanzan a unha poboación total de 1,3 millóns de persoas (o 49% da poboación de Galicia) a través 110 concellos das provincias da Coruña e Pontevedra. Conta cunha rede sólida e comprometida de máis de 2.800 persoas voluntarias e un equipo técnico de case 100 profesionais.
