Redeia e a Asociación Amicos asinaron un acordo de colaboración para restaurar e conservar a biodiversidade dos fondos mariños da contorna do Parque Nacional Marítimo Terrestre das Illas Atlánticas. O proxecto, cun ano de duración e un investimento por parte de Redeia próximo aos 65.000 euros, enmárcase na Plataforma Bosque Mariño de Redeia, que promove a conservación e restauración dos ecosistemas mariños de maior valor ecolóxico de aquí a 2030.
O convenio de colaboración entre Redeia e Amicos, que xa está en desenvolvemento, contempla actuacións pioneiras na área da ría de Arousa. Estas accións estarán centradas na recuperación dunhas 200 gorgonias, capturadas accidentalmente durante a actividade pesqueira.
Amicos explicou que son os propios pescadores quen recuperan as gorgonias e, unha vez en porto, trasládanas aos acuarios do hospital da Asociación Amicos, habilitado nas instalacións da Confraría de pescadores da Lonxa de Ribeira. Alí, son coidadas polo equipo de Amicos que posteriormente as devolven ao seu hábitat natural. Dende Amicos engadiron que este tipo de restauración activa emprega o método bádminton desenvolvido polo Instituto de Ciencias do Mar do Consello Superior de Investigacións Científicas (ICM-CSIC), que consiste en fixar as gorgonias a pedras naturais para que estas fagan peso, o que permite que as colonias aterren de pé ao ser lanzadas desde unha embarcación.
O proxecto contempla realizar un seguimento científico para coñecer a súa viabilidade a longo prazo.
As gorgonias son organismos crave dos ecosistemas mariños vulnerábeis. A captura accidental reduce as súas poboacións, o que afecta á biodiversidade mariña e ameaza a sustentabilidade do resto de especies que viven ou benefícianse do ecosistema dos fondos mariños, como o marisco, de interese comercial para a economía local. Este proxecto non só protexe o medio ambiente, senón que beneficia ao sector pesqueiro artesanal, ao asegurar a viabilidade dos seus recursos a longo prazo e favorecer unha actividade máis sostíbel. Outro dos obxectivos do proxecto será a contribución para manter o alto valor natural e turístico das Rías Baixas, fundamentais para a economía local.
Restauración e valor social
O proxecto ten a sensibilización social no centro do seu traballo, en palabras de Amicos, que entade que o carácter máis innovador reside no seu enfoque inclusivo: son persoas con discapacidade intelectual quen desenvolven as accións científicas e técnicas de restauración mariña. “Deste xeito, reivindícase a súa capacidade para contribuír aos retos que a sociedade enfronta no seu conxunto”, sinala Amicos, engadindo que “nesta iniciativa participan de maneira directa 40 usuarios de Amicos en calidade de axentes medioambientais”.
Doutra banda, esta iniciativa incluirá unha campaña de sensibilización sobre a conservación dos ecosistemas mariños –como refuxio de especies autóctonas e fundamentais para loitar contra o cambio climático– dirixida a cidadáns e en particular ao sector pesqueiro, cuxa implicación é fundamental neste proxecto. Ao redor de 10 mariñeiros recibirán formación en conservación
Para Redeia, esta colaboración reforza a súa visión de negocio sostíbel e o seu compromiso co coidado dos océanos e das comunidades costeiras. A protección dos ecosistemas mariños é esencial para a biodiversidade, para a loita contra o cambio climático e para o futuro da sociedade. Este proxecto une ciencia, inclusión e sensibilización para xerar un impacto positivo real no ecosistema, as persoas e a economía.
O proxecto de gorgonias en Galicia enmárcase na plataforma Bosque Mariño, unha iniciativa estratéxica de Redeia para a conservación dos hábitats mariños de maior valor ecolóxico a través de restauración activa e pasiva realizadas con validación científica, así como acompañadas de accións de educación e divulgación ambiental.
