A Asociación Boirense de Empresas (ABE) puxo en marcha co inicio do curso unha nova campaña baixo o lema Volta ao cole: Cada compra suma. Desenvolverase entre o 10 de setembro e o 5 de outubro, cun sorteo final o día 6 de outubro. O obxectivo principal da iniciativa é incentivar as compras locais nos máis de 200 negocios asociados, ao tempo que se reforza o compromiso social da entidade a través dunha colaboración coa Cruz Vermella de Boiro, destinada a apoiar ás familias con maiores necesidades no inicio do curso escolar.
Como funciona a campaña
As persoas que realicen compras nos negocios asociados poderán rexistrar os seus tíckets na web da ABE. Cada tícket participará no sorteo dun ordenador portátil HP e, tamén, xerará unha doazón de 0,10 € por parte da ABE á Cruz Vermella de Boiro.
O importe recadado transformarase en Bonos ABE, que a Cruz Vermella repartirá entre as familias máis necesitadas, para que poidan adquirir material escolar nos establecementos locais.
Impacto previsto
A web da ABE acumula neste 2025 unha media de máis de 3.000 rexistros mensuais, acadando en xullo un máximo histórico de 3.995 rexistros. O reto da campaña é superar esa cifra, o que suporía unha doazón superior aos 400 € en bonos para material escolar, segundo explicou a ABE.
Visibilidade e material promocional
Para dar a coñecer a campaña, ABE distribuirá entre os comercios asociados cartaces e cabaletes de mostrador, ademais dunha ampla campaña publicitaria en web e redes sociais, co obxectivo de acadar a máxima difusión entre a veciñanza.
Declaracións institucionais
O presidente da ABE, Daniel García, destacou que “queremos que cada compra conte por partida dobre: como apoio ao comercio local e como axuda directa a familias que precisan un impulso extra neste comezo de curso. É unha oportunidade para demostrar que en Boiro mercar no comercio de proximidade tamén é un xesto solidario”.
Pola súa parte, o presidente da Cruz Vermella de Boiro, Julio García, sinalou que “esta colaboración con ABE vai permitirnos apoiar a moitas familias que afrontan o inicio do curso con dificultades. É un exemplo de como o tecido empresarial pode sumar esforzos coas entidades sociais para mellorar a vida da comunidade”.
A concelleira de cultura, María Outeiral, quixo felicitar á iniciativa subliñando que “esta campaña amosa o mellor de Boiro: comercio, solidariedade e compromiso coa veciñanza. Dende o Concello apoiamos todas aquelas accións que reforcen o consumo local e que teñan un impacto positivo na sociedade”.
Revista Boiro, compras con corazón
Así mesmo, aproveitouse a rolda de prensa para presentar a revista resumo da campaña Boiro, Compras con Corazón, xa dispoñíbel na web da ABE. O documento recolle os principais fitos e resultados desta iniciativa, “que se consolidou como unha das campañas máis relevantes da asociación en apoio ao comercio local”, en palabras da patronal, que reforza con estas iniciativas o seu compromiso “co consumo de proximidade e co benestar social da veciñanza, demostrando que cada compra pode ter un impacto positivo máis aló da propia transacción”.
