Unha nova directiva da Comisión Virxe do Carme de Abanqueiro recupera a Festa na Honra da Virxe do Carme, que terá lugar os días 5, 6 e 7 de setembro. A concelleira de Cultura, María Outeiral, participou na presentación do programa de actividades xunto con Victor Rey e José Manuel Dieste.
Segundo explicaron, as actividades comezan o venres día 5 coa misa na honra de San Sebastián, que será na Igrexa de Abanqueiro. Continúan o sábado coas alboradas con Arume e Salgueiriños, misa na honra de San Roque, actividades infantís e pola noite verbena con DJ Matrek.
O domingo 7 será o día grande coa misa cantada e procesión marítima na honra da Virxe do Carme, que será ás 11.30 horas no peirao do Bodión, e pola noite verbena con Grupo Aché e Xacobo de Mínimo Eventos.
“Retomamos esta festividade despois de moitos anos de interrupción cun programa que se vai desenvolver maioritariamente no campo da festa de Exipto pero que contará tamén coa tradicional misa e procesión marítima no Bodión”, afirmaron por parte da comisión.
A concelleira de Cultura, María Outeiral, convidou á veciñanza a sumarse a esta festa que se recupera este ano: “Estamos no remate do verán pero a actividade cultural continúa en Boiro gracias ao gran traballo que fan as nosas comisións de festas”.
PROGRAMA
Venres 5 de setembro
21.00h – misa na honra de San Sebastián na Igrexa de Abanqueiro
Sábado 6 de setembro
Alborada co grupo Arume e Os Salgueiriños
12.00h – misa na honra de San Roque na Igrexa de Abanqueiro
19.00h – actividades para nenos/as no campo da festa de Exipto
22.00h – verbena con Matrek
Domingo 7 de setembro
11.30h – misa cantada na honra da Virxe do Carme no muelle do Bodión e procesión marítima con ofrenda floral verbena con Grupo Aché e Xacobo Mínimo Eventos
