O Consello da Xunta aprobou hoxe o proxecto da Lei do clima de Galicia, a primeira norma autonómica que fixa por lei o obxectivo de neutralidade climática. O presidente, Alfonso Rueda, anunciou que o texto será remitido ao Parlamento co obxectivo de que quede aprobado antes de que remate o ano.
A futura lei establece como meta que Galicia sexa unha comunidade neutra en emisións de gases de efecto invernadoiro no ano 2040, unha década antes do prazo marcado pola Unión Europea. Para logralo, prevé dotar á comunidade dos órganos, instrumentos e ferramentas necesarias, situando o clima como eixe transversal de todas as políticas públicas.
“Queremos que calquera contrato, plan ou política da Xunta teña en conta a perspectiva climática”, destacou Rueda. Pola súa banda, a conselleira de Medio Ambiente e Cambio Climático, Ángeles Vázquez, subliñou que Galicia será a primeira comunidade en recoller este compromiso por lei, facilitando “unha transición ecolóxica xusta, sostible e xeradora de emprego verde”.
A norma recolle obxectivos concretos de mitigación e adaptación, como a redución nun 75 % das emisións en 2030 respecto a 1990 ou a creación de refuxios climáticos para protexer a poboación das vagas de calor. Tamén prevé cláusulas climáticas na contratación pública, a implantación dun sistema voluntario de créditos de carbono, novos instrumentos de planificación e a posta en marcha da Oficina de Cambio Climático de Galicia.
Segundo lembrou Rueda, Galicia xa lidera a redución de emisións no Estado, cunha baixada do 61,7 % das emisións netas de CO₂ desde 1990, “cinco veces máis que a media española”.
O proxecto lexislativo, que agora inicia a súa tramitación parlamentaria, permitirá consolidar e ampliar as medidas postas en marcha nos últimos anos, completando o marco normativo da sostibilidade e situando a Galicia á vangarda da loita contra o cambio climático en Europa.
