A droga foi interceptada en terra, a bordo dun vehículo. No operativo traballaronn de maneira conxunta axentes da comisaría de Ribeira e de Vigo
A Policía Nacional comisou esta madrugada un alixo de 1.500 quilos de cocaína na Pobra do Caramiñal, tras unha persecución na que os ocupantes do vehículo que transportaba a droga fuxiron ao ser detectados por axentes .
A intervención produciuse nas inmediacións dunha gasolineira situada á entrada da vila, despois de que a mercadoría fose descargada nunha praia do municipio, previsiblemente na zona de Cabío. A droga era trasladada nun turismo con remolque, do que caeu durante a fuxida a tonelada e media de estupefaciente. Os investigadores sospeitan que outro coche, cargado cunha cantidade similar, conseguiu escapar.
O operativo, desenvolto no marco dun procedemento xudicial, iniciouse ao redor das catro da mañá coa participación de axentes das comisarías de Ribeira e Vigo, ademais do apoio dun helicóptero que continuou sobrevoando a localidade durante todo o sábado.
As pescudas céntranse agora na análise das cámaras de seguridade instaladas no polígono industrial da Tomada, a escasa distancia do lugar onde se consumou a intervención, así como noutros puntos do centro urbano.
A droga incautada estaba distribuída en fardos de catro colorees —azul, branco, amarelo e vermello—. Na zona aínda podían observarse esta mañá restos de cocaína, xunto a luvas utilizadas polos axentes e follas de piñeiro, especie predominante nos montes próximos á praia de Cabío.
Polo momento, non se produciron detencións, e a investigación continúa aberta para localizar tanto aos responsables do alixo como ao vehículo que logrou escapar con parte da carga.
