O Concello de Dodro, a través da Biblioteca Municipal, vai comezar outubro con actividades de lecer para público infantil e familiar coas que afrontar, con cultura e creatividade, o remate definitivo do verán.
As sesións, encadradas no programa Outubro na Biblioteca, comezan o 10 de outubro cun obradoiro de escultura en papel con pedras de papel, para nenas e nenos de máis de seis anos. Convócase baixo o epígrafe Bestiario animal.
O 24 de outubro será a quenda do espectáculo de narración oral E a ti que che contaban?, da narradora e contadora Verol Rinlo. Será unha actividade para crianzas de máis de tres anos convocada con motivo da celebración do Día Internacional das Bibliotecas.
O 31 de outubro haberá máis narración oral e música na Biblioteca Municipal de Dodro, da man de A Xanela do Maxín. Trátase do espectáculo Supercoroza na eira e na lareira, encadrado na Rede Cultural 2025 da Deputación da Coruña.
As prazas son limitadas e cómpre inscribirse no 981 802 472.
