O Concello de Muros vén de poñer en marcha unha das novidades da programación turística deste verán: un roteiro nocturno que enlaza a estación de arte rupestre do Abrigo das Cruces coa coñecida Laxe das Rodas, en Louro.
A actividade, organizada pola Concellaría de Turismo de Muros, busca ampliar a oferta de visitas guiadas e poñer en valor o patrimonio histórico do municipio.
“A nosa intención é dar a coñecer a riqueza patrimonial do noso concello. A novidade deste ano foi ampliar o roteiro da Laxe das Rodas incluíndo a visita ao Abrigo das Cruces, situado a escasos 500 metros, e que é unha das paradas máis demandadas tanto polos visitantes como pola propia veciñanza”, explica a concelleira de Turismo, Caridad González.
O programa de visitas guiadas complétase co percorrido polo Conxunto Histórico de Muros, que se realiza todos os martes de xullo e agosto ás 11.30 horas, e coa ruta nocturna pola vila prevista para o venres 29 de agosto.
As prazas son limitadas, polo que é preciso inscribirse previamente chamando ao 981 826 050 (extensión 2) ou acudindo á oficina de turismo.
