O director de Turismo de Galicia, Xosé Merelles, mantivo este luns unha reunión co presidente da Mancomunidade de Municipios Barbanza Arousa e alcalde de Rianxo, Julián Bustelo, acompañado pola xerente da entidade, Fátima Cachafeiro, para facer balance da tempada estival no destino.
Ambas partes coincidiron en valorar positivamente os datos turísticos deste verán e subliñaron a importancia de traballar conxuntamente para avanzar na desestacionalización e garantir a chegada de visitantes ao longo de todo o ano.
Merelles salientou a relevancia das accións de promoción e reiterou a disposición do seu departamento a apoiar iniciativas que difundan experiencias auténticas e diferenciais da contorna, como a tradición conserveira ou a ruta do Mar de Arousa e Río Ulla.
Na reunión tamén se revisou o plan de sostibilidade da mancomunidade, poñendo en valor a aposta pola enogastronomía local como elemento de atracción turística, así como os proxectos desenvoltos ao abeiro do convenio da Xunta co xeodestino Barbanza Arousa.
