Salvamento Marítimo lanzou un chamamento á precaución tras detectarse novas interaccións e avistamentos de candorcas en augas da ría de Arousa. O organismo pide ás embarcacións que navegan pola zona que extremen as medidas de seguridade e sigan os protocolos establecidos para evitar incidentes.
Nas últimas semanas incrementáronse os avisos por parte de mariñeiros e navegantes deportivos que aseguran ter sufrido achegamentos e golpes contra o casco das súas embarcacións. Este comportamento, que xa se vén producindo en diferentes puntos da costa atlántica, obrigou incluso á modificación de percorridos en probas deportivas, como aconteceu recentemente na regata Mar de Fisterra.
As recomendacións de Salvamento Marítimo pasan por:
- Reducir a velocidade en caso de avistamento.
- Evitar manobras bruscas.
- Apagar o motor se os animais se achegan demasiado.
- Dar aviso inmediato ao 112 ou a Salvamento Marítimo para rexistrar a incidencia.
A ría de Arousa é unha das zonas con maior tráfico pesqueiro e deportivo de Galicia, polo que as autoridades insisten en manter a calma e actuar con prudencia ante a presenza destes cetáceos.
