Galicia vivirá este sábado, San Roque ( festivo local en Santiago) , unha xornada de tempo seco, marcada pola presenza de brétemas costeiras, especialmente densas durante a primeira metade do día en todo o litoral. A situación atmosférica virá condicionada por unha configuración pouco definida entre un anticiclón situado sobre as Illas Británicas e unha baixa relativa ao oeste da comunidade.
No interior, agárdanse algunhas néboas matinais, mentres que no resto do territorio predominarán os ceos despexados. Pola tarde, as néboas seguirán presentes na metade norte.
As temperaturas experimentarán un lixeiro a moderado descenso no litoral norte e nas Rías Baixas, mentres que no resto de Galicia permanecerán sen cambios significativos. O vento soprará frouxo do sur pola mañá, para virar a compoñente oeste-noroeste durante a tarde.
O noso mar: Vento do norte á mañá e do noroeste á tarde e á noite, forza 1 a 2 á mañá e á noite e 2 a 3 á tarde. Mar rizado á mañá e á noite e mar ovellado á tarde. Visibilidade mala á mañá e á noite e regular á tarde. Mar de fondo do noroeste, con ondas de 0.5 a 1 metros.
