Durante todo o verán, a Piscina Municipal de Rois converteuse nun dos espazos máis frecuentados do municipio, especialmente nos días de altas temperaturas, “ofrecendo”, en palabras do Concello, “unha alternativa segura e saudábel para todas as idades”. Nesta temporada solicitáronse e entregáronse 371 carnés de acceso, aos que se sumaron tamén numerosas persoas que optaron por acceder mediante entradas de día. O resultado foi “unha grande afluencia de usuarios durante todo o verán, que se intensificou nos días da vaga de calor, convertendo a piscina nun dos principais puntos de encontro e lecer da veciñanza”, explicaron dende o Goberno local.
“Desde o Concello de Rois, queremos agradecer a todos os usuarios a súa presenza e comportamento, que permitiron que a piscina se mantivese como un espazo de convivencia e desfrute seguro para familias, nenos e persoas de todas as idades”, engadiron.
O peche de temporada terá lugar este domingo, en horario habitual de apertura: de 16:00 a 20:30.
