O Concelleiro de Obras e Medio Ambiente de Rianxo, José Alberto Angueira, presentou este luns 4 de agosto a campaña de concienciación do Executivo de Rianxo e de Viaqua en relación a facer un consumo responsábel da auga. Segundo indicou, “estas recomendacións non implican, polo momento, a implantación de restricións nin prohibicións, mais pretenden sensibilizar ao conxunta da cidadanía sobre a importancia de usar de xeito racional a auga nunha época na que o recurso vai a menos e os consumos aumentan de maneira moi importante polas diferentes actividades que se desenvolven, así como polo aumento da poboación no noso municipio”.
Explicou tamén que nas “últimas semanas estase a rexistrar unha situación de escaseza de recursos hídricos que, aínda que non é crítica, leva ás autoridades e entidades xestoras a facer un chamamento á cidadanía para adoptar boas prácticas no consumo da auga da rede pública”.
Segundo a información publicada pola Xunta de Galicia, non hai activadas alertas nin pre-alertas por seca na nosa demarcación hidrográfica. Con todo, a evolución hidrolóxica está a ser seguida con atención, e recoméndase aplicar medidas de aforro no uso doméstico da auga.
A campaña do Concello de Rianxo pon o foco nas cousas que pode facer a cidadanía para non estragar recursos hídricos en catro ámbitos fundamentais: na cociña, no baño, no xardín e na piscina. Podemos ver ao detalle estas recomendacións na web municipal.
