Juan Caballero (textos e imaxe). Non houbo cambios na xeral e os vigueses Pablo Cabello e Óscar Romero convertéronse este domingo 31 de agosto nos novos campións da Copa de España de Vaurien, proba que organizou a Real Federación Galega de Vela (RFGV) na ría de Arousa coa colaboración da Deputación de Pontevedra e a Xunta de Galicia.
Aínda que Eolo fíxose esperar algo máis de media hora, o Comité de Regatas puido cumprir de novo co programa previsto para os 30 equipos participantes, que sumaron finalmente nos seus marcadores o total de nove mangas.
Pasadas as 11.45 horas, e cun vento do suroeste duns 8-9 nós de intensidade, a frota escoitou a saída para a primeira proba do día. Os xuvenís Sissel Acasuso e Jorge Campos (RCM do Abra RSC / RCM Santander) volveron demostrar o seu potencial levándose unha traballada vitoria, resultado que lles permitiu consolidar a súa posición no podio da regata.
Os outros dous triunfos parciais do día foron para Nacho Campos e Yolanda Bastos na segunda proba, e para Pablo Cabello e Óscar Romero (RCN Vigo) na terceira e última do campionato.
Con este último triunfo, Cabelo e Romero pecharon a súa participación con catro primeiros postos, tres segundos, un terceiro e un cuarto nas nove probas disputadas. Uns resultados brillantes que os converten en vencedores indiscutibles da Copa de España da clase.
“Foi unha Copa de España súper disputada e foron uns días moi emocionantes. Competimos todos moi duro, porque en apenas uns metros estabamos os seis ou sete primeiros, así que o gozamos moito”, comentou Cabello tras finalizar a xornada.
Por detrás, con tres terceiros postos anotados hoxe, o segundo posto definitivo foi para Pedro Fernández e Carolina Iglesias (RCN Rodeira), mentres que terceiros foron Acasuso e Campos.
Nas divisións xuvenil e feminina tampouco houbo cambios con respecto á xornada do sábado. Acasuso e Campos, ademais de lograr o terceiro posto na xeral, proclamáronse campións xuvenís cunha cómoda vantaxe sobre os segundos clasificados, Paco Riveras e Roque González-Llanos (RCN Vigo), que, sendo dos máis novos da frota, tamén brillaron cun sétimo posto na xeral absoluta. O terceiro posto xuvenil foi para Ramón Rey e Mencía García, tamén do RCN Vigo.
Entre as mulleres, tras a remontada do sábado, Iria Carballo e Ana Costas (RCN Vigo / RCN Rodeira) impuxéronse por diante de Paula González e Iida Suoniemi (CVF As Pontes / C. Grupo Bazán) e de Jimena e Alba Abril (CVF As Pontes).
A entrega de trofeos, que se celebrou nas instalacións do Centro Galego de Vela ás 17.00 horas, foi a encargada de poñer o broche final e contou coa asistencia de Manuel Villaverde, presidente da RFGV; Luisa Sánchez, vicepresidenta da Deputación de Pontevedra; Blanca García Señoráns, directora territorial da Consellería de Xustiza, Presidencia e Deportes; Elena Suárez, directora territorial da Consellería do Mar; Nacho Campos, presidente do comité de vela lixeira da RFGV; e Nacho Campos Méndez, presidente da asociación nacional da clase.
As próximas grandes citas que se disputarán no Centro Galego de Vela baixo a organización da RFGV serán a Regata da Muller – Campionato Ibérico cos Elliott 6m, do 19 ao 21 de setembro, e a Copa de España de ILCA 6, entre o 9 e o 12 de outubro.
