O PSdG comunicou este mércores 20 de agosto, por boca do seu voceiro autonómico, José Ramón Gómez Besteiro, e da deputada Carmen Dacosta, que “a Xunta de Galicia leva desde xaneiro bloqueados 8,3 millóns de euros de fondos europeos destinados á prevención de incendios forestais, o que deixou sen executar traballos esenciais nun verán marcado por unha vaga de lumes que arrasou miles de hectáreas”.
A deputada socialista Carmen Dacosta dixo que a Consellería do Medio Rural mantén sen resolver dúas liñas clave: 2,99 millóns de euros en obras de infraestruturas de prevención, repartidos en nove lotes aínda sen adxudica; e 5,4 millóns de euros en subvencións para actuacións preventivas (480 expedientes presentados), tamén pendentes de resolución.
“Estamos a falar de rozas, cortalumes, pistas forestais… tarefas que deberían estar feitas desde a primavera e que hoxe, sinxelamente, non existen sobre o terreo. É desolador ver que moitas desas actuacións estaban previstas precisamente en zonas que agora arden”, denunciou Dacosta.
“A prevención non pode seguir atrapada en trámites e papeis. Galicia non pode permitirse que os cartos europeos queden nos despachos mentres o lume arrasa o noso territorio”, sinalou.
Pola súa banda, o secretario xeral do PSdeG e voceiro do Grupo Parlamentario Socialista, José Ramón Gómez Besteiro, advertiu que” a prioridade inmediata segue sendo apagar os lumes, garantir a seguridade da veciñanza e apoiar ás familias afectadas”. Con todo, recalcou que, unha vez controlada a emerxencia, “o presidente Rueda deberá render contas pola súa xestión da vaga de incendios, e pola dispoñibilidade efectiva dos recursos e medios empregados nas tarefas de extinción.
