O Museo Municipal de Ribeira abriu as súas portas á nova exposición de artesanía que recolle os traballos realizados polas alumnas dos cursos impartidos ao longo de todo o ano pola asociación Amas de Casa de Ribeira.
A presidenta da entidade, Puri Cores, explicou que se trata dunha “mostra sobre a cultura que crean as nosas socias”, poñendo en valor tanto o talento das participantes como o labor do profesorado. Cores aproveitou para solicitar ao Concello un local máis amplo onde poder exhibir as manualidades, cadros e esculturas que elaboran as socias, así como máis vitrinas para o propio Museo Municipal.
O alcalde, Luís Pérez Barral, recolleu a proposta e adiantou que se dotará á sala con algún espazo adicional. O rexedor salientou o papel das Amas de Casa, destacando que “descentralizan a actividade, levándoa ás parroquias e dinamizando a vida destas localidades”.
Pérez Barral engadiu que a entidade presta un servizo esencial, especialmente para as persoas maiores, ofrecéndolles oportunidades de aproveitar o seu tempo de ocio, reunirse e compartir experiencias.
