A Concellería de Igualdade da Pobra do Caramiñal quere reafirmar, un ano máis, a súa aposta pola conciliación familiar dos veciños e veciñas do municipio co próximo lanzamento e inicio dos servizos de monitorado de Madruga e Comedor. Ambas prestacións estarán dispoñíbeis desde o luns, 8 de setembro, e ata o mes de xuño.
As persoas interesadas en facer uso de calquera dos programas deberán anotarse previamente entregando a ficha de inscrición cuberta e asinada con dous días hábiles de antelación ao inicio do servizo. Deste xeito, se unha familia precisa destes programas o primeiro día do curso escolar 2025-2026, deberá entregar a documentación, como máximo, o mércores, 3 de setembro. A solicitude estará dispoñíbel ao longo de todo o curso pero esta deberá facerse, en todo caso, con dous días hábiles de antelación.
A documentación poderá entregarse a través da sede electrónica (instancia xeral), de forma presencial no servizo de Igualdade e, ao longo do período lectivo, ao monitorado do Madruga e Comedor. A inscrición poderá realizarse tanto por mes natural completo como por medio mes, días soltos ou por días esporádicos.
O Concello mantén os mesmos prezos que en convocatorias anteriores, aplicándose un desconto do 50% para segundos irmás e unha bonificación do 100% para o terceiro fillo/a. As tarifas serán as seguintes:
No mes de setembro e xuño:
– 8,40 euros por mes completo cunha hora de atención ao día.
– 11,20 euros por mes completo con máis dunha hora de atención ao día.
No resto de meses do curso escolar:
– 12 euros por mes completo cunha hora de atención ao día.
– 16 euros por mes completo con máis dunha hora de atención ao día.
– 8 horas por atención de dúas semanas e unha hora de atención ao día.
– 12 euros por dúas semanas con máis dunha hora de atención ao día.
Para días soltos e puntuais, as tarifas serán de 2 euros por unha hora de atención e 2,5 euros por máis dunha hora de atención.
As persoas interesadas poderán chamar ao 981 832 764 (extensión 6) ou escribir un correo electrónico a igualdade@apobra.gal.
