Mulleres Salgadas, asociación feminista de mulleres do mar de Galicia, anunciou a renovación da súa xunta directiva elixida na asemblea xeral celebrada onte (18 de agosto) en Vilagarcía de Arousa. A nova presidencia será ocupada por María Vales Martínez, quen asume o cargo co obxectivo de continuar e impulsar o labor da organización.
María Vales Martínez, socia da asociación desde os seus inicios, conta cunha ampla experiencia no sector e foi durante oito anos patroa maior da Confraría de Vilanova de Arousa. O seu liderado centrarase na promoción da igualdade, a paridade nos órganos de representación e o apoio ás mulleres do mar.
A nova presidenta sucede a Dolores Gómez Ordóñez, quen estivo á fronte da asociación durante o últimos seis anos. Baixo a dirección de Gómez Ordóñez, Mulleres Salgadas experimentou “un gran crecemento, consolidándose como unha voz fundamental para as mulleres do sector”, informou a entidade, engadindo que Dolores Gómez Ordóñez seguirá formando parte da xunta directiva, sucedendo a Sandra Amezaga Menéndez no rol de secretaria.
A nova xunta directiva tamén incorpora a Marinha Guizán Cascón, Inmaculada Rodríguez Rial e Maria Dolores Dieste Triñanes como vogais, achegando novas perspectivas e enerxías ao equipo.
Pola súa banda, Celia Herbón Dieste continúa como vicepresidenta, Susana Silva Alonso no seu posto de tesoureira e Concepción Ramallo Sampedro mantén o seu cargo como vogal.
A nova xunta directiva, con María Vales á cabeza, reafirma o compromiso de Mulleres Salgadas coa súa misión e obxectivos, nunha liña continuista, fortalecendo o papel das mulleres nun sector de vital importancia para a economía de Galicia.
