O cambio de alcaldía en Noia motivou este martes a celebración dunha xuntanza na casa consistorial para elixir o novo presidente da Asociación Rural de Desenvolvemento (ARD) Ría da Estrela. O cargo, que ata agora ocupaba Santiago Freire, pasa a mans do alcalde de Porto do Son, Luis Oujo Pouso, nunha candidatura única e de consenso apoiada polos cinco concellos integrantes e polos tres partidos con representación (PP, PSOE e BNG).
Deste xeito, Oujo sucede a Freire tamén nesta entidade, do mesmo modo que fixo recentemente na presidencia da Asociación de Concellos do Camiño da Ría Muros-Noia. Mantense así a tradición, vixente desde 2018, de que unha mesma persoa dirixa ambas as dúas organizacións para favorecer a coordinación e a creación de sinerxías.
No seu primeiro discurso como presidente, Luis Oujo agradeceu o apoio da xunta directiva e comprometeuse a dar continuidade á liña de traballo iniciada con Teresa Villaverde e mantida por Santiago Freire. “Obxectivos como o crecemento do xeodestino, centrados na esencia da Ría da Estrela, seguirán sendo prioritarios e compartidos por todos”, subliñou.
A renovación da directiva supón tamén a incorporación do alcalde de Noia, Francisco Pérez Caamaño, como tesoureiro, cargo que deixou vacante Oujo. Pérez Caamaño destacou “a necesidade de consenso e de colaboración absoluta entre concellos e alcaldes en aras dos intereses da Ría da Estrela e do Camiño da Ría Muros-Noia”.
A nova xunta directiva queda conformada por:
- María Lago Lestón, alcaldesa de Muros, vicepresidenta.
- Francisco Pérez Caamaño, alcalde de Noia, tesoureiro.
- Francisco Calo Abelleira, alcalde de Outes, secretario.
- Teresa Villaverde Pais, vogal.
Durante a reunión, Oujo propuxo celebrar todas as reunións da ARD e da Asociación de Concellos do Camiño na Casa Consistorial de Noia, por razóns de centralidade xeográfica. A proposta foi aceptada polo alcalde noiés e respaldada polo resto de membros da directiva.
