Un condutor resultou ferido de carácter leve este martes tras sufrir un accidente de tráfico na autovía de Barbanza (AG-11). O sinistro produciuse no punto quilométrico 18, ao seu paso polo municipio de Rianxo, pouco antes do mediodía.
Segundo fontes de emerxencias, o accidente consistiu nunha saída de vía na que só se viu implicado un vehículo. O condutor, único ocupante do turismo, puido saír polos seus propios medios.
Ata o lugar desprazáronse os bombeiros de Boiro, a Policía Local de Rianxo, a Garda Civil de Tráfico e unha ambulancia do 061, que prestou asistencia ao ferido. Este solicitou a alta voluntaria tras ser atendido polos sanitarios.
O operativo mantívose activo ata a retirada do vehículo da calzada para restablecer a circulación con normalidade.
