Este venres 8 de agosto comeza a Romaría de Neixón (44ª edición), en Boiro, que está previsto que se desenvolva ata o domingo 10. Arrincará este venres coa VII edición do Serán Tradicional, a partir das 21.00 horas. Actuarán Os Pequenos do Barbanza, Nunca é Tarde, Abeloura, Cantareiras Mar de Cabo, As da Bonia, Esroupele, AC Retranqueiros, Arrancadeira, As Garridiñas e Xodó. Haberá sorteos ao longo da noite e degustación de callos e rosca. Ao rematar haberá foliada libre.
Ao día seguinte, sábado 9 de agosto, haberá pola noite (a partir das 21.30 horas) unha verbena con Duo Platino e a Orquestra Bamboleo, seguidos de Chocolate Disco Móbil. A noite do sábado virá cunha mexiollada ao longo da noite.
O domingo 10 de agosto comezará cunha gran sardiñada e unha comida campestre. Haberá polbeiro (Arenteiro do Carballiño) e mercado de artesanía. Ás 11.45 horas celebrarase unha procesión polos núcleos de Quinteiro e Nine e ás 13.00 horas celebrarase unha misa na honra da Virxe do Carme e de San Xosé, cantada polo Coro San Vicente de Cespón. Ao remate da misa haberá bailes tradicionais a cargo de Abeloura, e, tamén, gaitas pola mañá e pola tarde a cargo de Os Pequenos de Barbansa, Trécola e O Ar de Loureda. A partir das 20.00 horas, tardeo con Minimo Eventos e máis sorteos.
