Esta fin de semana, o sábado 23 de agosto e o domingo 24, o Club Náutico de Barraña e o Club Náutico Portonovo, coa Federación Galega de Vela, organizan a XXIX edición da Regata Cruceiro Cenor – Trofeo Concello de Boiro.
A regata está dividida en catro categorías, dúas para barcos ORC, solitario e clásicos e veteranos. O percorrido é dunhas vinte millas de ida e outras tantas de volta. A regata sairá do Náutico do Portonovo para chegar a Barraña o sábado pola tarde e volverá saír do Náutico de Barraña cara Portonovo o domingo pola mañá.
O alcalde, José Ramón Romero, participou este xoves 21 na presentación xunto con Javier Ruiz de Cortázar, presidente do náutico de Portonovo, e Jesus Babío, presidente do Náutico de Barraña.
Como dixemos, a proba está dividida en tres categorías: para barcos ORC, solitario e clásicos e veteranos. “É unha regata autonómica e unha das mais emblemáticas de Galicia que hai 20 anos que se celebra e xa leva case dez vindo a este náutico de Barraña”, afirmou Cortázar.
Está prevista a participación dunhas 22 embarcacións e máis de 60 persoas que chegarán o sábado a Boiro e participarán neste Trofeo Concello de Boiro. “Para o Náutico de Barraña é unha satisfacción acoller esta regata unha vez máis no noso náutico”, recoñeceu Jesús Babío.
O alcalde, José Ramón Romero, agradeceu aos dous náuticos a súa implicación na organización desta cita que se repite ano tras ano e comprometeu a colaboración do Concello de Boiro “en seguir apostando polo deporte da vela e o turismo náutico no noso concello”.
