Unha operación conxunta da Policía Nacional e a Policía Local de Santiago de Compostela permitiu deter a un menor acusado de provocar ata sete incendios entre os días 7 e 17 de agosto nos barrios de Vidán e A Rocha.
A investigación púxose en marcha tras a aparición de varios focos sospeitosos, o que levou a reforzar a vixilancia policial con patrullas preventivas. Grazas aos avisos veciñais e ás pescudas realizadas, os axentes identificaron ao sospeitoso, veciño da mesma zona afectada. No momento do arresto portaba dous mecheiros.
Os lumes calcinaron un total de 1,36 hectáreas, o que obrigou a intervir tanto ao servizo forestal como ao corpo de bombeiros da cidade para a súa extinción.
Tras a práctica das dilixencias, o menor foi posto a disposición da Fiscalía de Menores da Coruña, que decretou o seu ingreso nun Centro de Internamento.
As forzas de seguridade subliñaron a importancia da colaboración cidadá para resolver o caso e lembraron que os avisos veciñais son fundamentais para previr delitos desta gravidade.
