Juan Caballero (texto e fotos). Cartel de luxo o que estará na saída da XXXVII edición da Mar de Finisterre – XI Trofeo Pitusa Sabín, que organiza esta fin de semana o Real Club Náutico Portosín. En total, máis dunha trintena de veleiros tomarán parte na gran cita velística da ría de Muros e Noia, dos que 19 fano en ORC e 13 en Open, puntuando para a Copa de Galicia de Clubs, Clasificatoria Galega para o Campionato de España de Cruceiros e Puntuable para o Trofeo Presidente Xunta de Galicia Circuito Alto Nivel.
Contarase con unidades como o Urbapaz, de Fran Edreira, do Club Náutico de Cabanas, que se presenta na comarca como vixente gañador da 62ª Regata Rías Baixas, que organizou ata o pasado domingo o Real Club Náutico de Vigo. Edreira gañou a súa combinada ORC 1-2 e a xeral. Outra das credenciais preséntaas o Deep Blue, de Vicente Cid, do náutico da cidade da oliveira, primeiro tamén no Rías na súa División ORC 3.
Outro dos grandes favoritos e que non deixa de sorprender polos seus éxitos deportivos é o barco da Armada Española, o Mirfak, patroneado por Diego López, da Comisión Naval de Regatas de Ferrol, que se fixo co triunfo da Regata Infanta Elena, do Náutico da Coruña, primeira das cinco que compoñen o Trofeo Presidente e das que Portosín é a terceira. A segunda, organizada polo Club Náutico Ría de Ares foi precisamente para o Urbapaz.
Mirfak chega tamén co trofeo nas mans da Regata de Cruceiros de Aguete, que gañou levándose a primeira proba do Campionato de España, da que Portosín tamén forma parte, conxuntamente co Club de Iates de Baiona.
Pero sen dúbida, o favorito local e cun brillante palmarés nas súas vitrinas, é o Siradella, de Francisco Gude e César Álvarez, que defende a grímpola do Real de Portosín, do mesmo xeito que o Escora, de Miguel Reboreda, ou O Montaraz, de José Carlos Costas, entre outros.
Desde a ría de Vigo tamén chegan barcos como o Bon III, de Víctor Carrión, do Club Náutico Punta Lagoa; o Exit Manitú, de Emilio Lago, do Liceo Marítimo de Bouzas; ou o Orión, de Alberto Pérez e o Sara 3.0, de Rafael Blanco, ambos os do Monte Real Club de Iates de Baiona.
Emoción á Pitusa Sabín, sen ningunha dúbida, a que lle achega o Nortemar-Peperetes, de José Manuel Millán, do Real Club de Regatas de Galicia, que practicamente o está gañando todo; así como o Lambaix, de Antonio Ríos, de Cabanas; o Alcaraván III, de Pablo García-Arenal, de Portosín; o Piko Norte, de José Manuel Castro, do Club Náutico de Boiro; ou o Cámping Ría de Arousa, de José Manuel Pombar, do Club Náutico Arousa Norte.
O top de saída está previsto ás 12 da mañá para os ORC que, dependendo das condicións de mar e vento, tentarán chegar ata a enseada de Fisterra, co labor de virar o mítico faro do Carrumeiro Chico, na entrada da ría de Corcubión, con 35 millas náuticas, entre a subida e a baixada. A previsión é dunha compoñente moi frouxa, estando nos plans do comité recortar o percorrido costeiro ata as proximidades dos baixos de Miñarzos, situados máis ao norte da ría. Os Open teñen programado o bocinazo a continuación, trazando unha travesía entre boias polo seu interior.
O domingo a saída será unha hora antes, contorna ás 11 da mañá. Primeiro para os Open, noutra regata costeira interior. E seguido para os ORC, que terán programadas dúas probas ao vento, os clásicos barlovento-sotavento. Non se darán saídas máis tarde da tres e media, sendo a entrega ás 17.30, coa presenza dos patrocinadores, Dominga Sabín (Pitusa) e Jacinto Hernández.
