O Grupo Etnográfico Mascato lembra ao activista grovense
Esta semana celébrase o Memorial Luís Rei, un programa de actividades impulsado polo Grupo Etnográfico Mascato co apoio de entidades como Dorna Meca, Culturmar, Amigos do Qinteiro e o BNG, para render homenaxe á figura de Xosé Luís Rei Núñez (O Grove, 1960 – Pontevedra, 2015) no décimo aniversario da súa morte.
Diplomado en Maxisterio e técnico de cultura no Concello de Cambados, Rei foi un activista social e político, fundador do Colectivo Ecoloxista do Salnés, concelleiro no Grove polo BNG e militante de Anova. Comprometido coa defensa do patrimonio mariñeiro, participou no Grupo Etnográfico Mascato e na Federación Galega pola Cultura Marítima e Fluvial (Culturmar), dirixindo durante anos a revista Ardentía, que se convertería nunha referencia no sector.
Especialista na historia local de Cambados, O Grove e a ría de Arousa, dedicou boa parte do seu labor investigador a figuras como Ramón Cabanillas —sobre o que publicou Crónica de desterros e saudades (2009) e a obra teatral Antre as roseiras de Cabanillas— e Basilio Álvarez, de quen deixou inconclusa Basiliana, editada en 2022.
O seu legado cultural e mariñeiro recóllese tamén en obras como Farol perpetuo na néboa. Luís Rei e a cultura marítima (2020), publicada a título póstumo. Ao longo dos anos, a súa figura foi recoñecida con distincións como o Premio Ramón Cabanillas, a edición do libro-homenaxe Luís Rei. Crónica de traballos e amizades (2015), a inclusión no Álbum de Galicia do Consello da Cultura Galega, así como o nomeamento da Biblioteca Municipal de Cambados e do Premio de Investigación do Concello do Grove na súa honra.
As actividades de lembranza culminarán mañá, venres, na Salga de Moreiras (O Grove) cunha arribada de embarcacións tradicionais, un coloquio aberto con familiares e amizades, e a presentación do libro A palabra sempre en alto. Traballos inéditos e dispersos, que recupera textos nos que volve lucir o seu talento literario, o rigor documental e o seu característico sentido do humor.
