O Consello da Xunta autorizou hoxe o inicio das obras da primeira fase da nova planta de adaptación para a primeira venda e envasado de peixe plano (rodaballo e linguado) que Stolt Sea Farm construirá no polígono industrial de Rianxo. O proxecto, que conta coa declaración de Proxecto Industrial Estratéxico (PIE), suporá un investimento de 44,8 millóns de euros e a creación de 100 postos de traballo directos, que ascenderán a 173 coa posta en marcha da segunda fase.
As obras comezarán nas próximas semanas e permitirán ampliar a capacidade de procesado e envasado da empresa, actualmente centralizada na planta de Lira (Carnota). A nova infraestrutura, que ocupará máis de 21.200 m², facilitará a automatización do procesado de peixe fresco procedente das súas granxas, incrementando a valorización dos produtos acuícolas e axustándose mellor ás esixencias do mercado.
A planta contará con tecnoloxía de última xeración e altos estándares de eficiencia enerxética e produtiva. Ademais, incluirá unha unidade de I+D+i orientada a fortalecer a colaboración con centros tecnolóxicos e axentes da investigación, co obxectivo de desenvolver novos formatos de comercialización e implantar un modelo de integración vertical coas demais plantas da compañía.
Stolt Sea Farm, empresa fundada en Noruega en 1972, é líder mundial na acuicultura terrestre de alta tecnoloxía e principal provedora de rodaballo e linguado. Exporta preto do 60 % da súa produción, con capacidade para 6.500 toneladas anuais de rodaballo e 1.700 de linguado. A metade das súas 14 granxas están en Galicia, en municipios como Camariñas, Lugo, Ribeira, Carnota e Muxía, empregando a 450 persoas na comunidade.
Este é o segundo Proxecto Industrial Estratéxico aprobado de forma definitiva pola Xunta dos 16 declarados ata o momento, tras a recente luz verde á ampliación da planta de Urovesa en Valga.
Os 16 proxectos industriais estratéxicos impulsados polo Goberno galego supoñen unha mobilización de arredor de 2.500 millóns de euros e máis de 4.500 empregos. Entre eles destacan iniciativas como a planta de hidróxeno verde nas Pontes, a fábrica de pneumáticos de Sentury Tire, a planta de metanol verde de Forestal del Atlántico en Mugardos ou a factoría de produtos do mar conxelados de Congalsa na Pobra do Caramiñal.
A Xunta tramitará todos estes proxectos de forma conxunta, prioritaria e urxente, a través da Secretaría Xeral de Industria e Desenvolvemento Enerxético da Consellería de Economía e Industria, co obxectivo de reforzar o tecido industrial galego e promover un desenvolvemento sustentable e xerador de emprego.
