A Asociación Ambar das Persoas con Diversidade Funcional, entidade inclusiva do Barbanza, anuncia a apertura do prazo de inscrición para unha nova formación gratuíta en Competencias Clave Nivel I e II. O obxectivo desta iniciativa é “dotar ás persoas participantes na formación, dos coñecementos básicos en materias fundamentais para o seu desenvolvemento persoal e profesional”.
Segundo explica Ambar, o curso foi deseñado para reforzar as habilidades en Matemáticas, Lingua Castelá e Lingua Galega e “ten unha importancia estratéxica, xa que a súa superación permite ao alumnado acceder a diversos cursos de formación profesional sen necesidade de contar cos títulos de ESO ou Bacharelato. Deste xeito, a formación actúa como unha ferramenta esencial para derrubar barreiras e promover a inclusión laboral”.
“Con esta formación buscamos o apoderamento das persoas e abrirlles un camiño directo cara a novas oportunidades profesionais”, afirma Lidia Mariño, educadora especialista en atención á diversidade da Asociación Ambar, engadindo que se trata “dun paso fundamental para que poidan seguir formándose e ter un papel activo no mercado laboral, cumprindo así a nosa misión de Impulsar vidas independentes en comunidade”.
A formación está dirixida a persoas que teñan un nivel competencial mínimo de 6º de primaria, con vontade de aprender e compromiso de asistencia. O prazo de inscrición estará aberto ata o vindeiro 27 de outubro.
As persoas interesadas en participar poden formalizar a súa inscrición ou solicitar máis información a través do teléfono 981 874 480 ou enviando un correo electrónico a educacioninclusiva@asociacionambar.org.
