O Concello de Noia acollerá un ano máis a súa Carreira Pedestre Popular Nocturna, que nesta XXVII edición levará por título “Noia medieval” e volverá render homenaxe a Hipólito Rey “Polo”, pioneiro e impulsor do atletismo na vila.
A proba celebrarase polas rúas noienses e dará comezo o sábado 30 de agosto ás 20:30 horas dende a Alameda. Abrirán a competición as categorías escolares “Chupete” (250 m) e “Pitufo” (350 m), seguidas das categorías Sub 10 e Sub 12 (1 km) e posteriormente Sub 14, Sub 16 e Sub 18 (3 km). Estas carreiras infantís e xuvenís contarán cun primeiro reparto de trofeos.
O prato forte chegará co circuíto das categorías Sub 20, Sub 23, Senior e Máster, cun percorrido urbano de 8 km e saída tamén dende a Alameda. Esta proba repartirá trofeos e premios en metálico para clubes e atletas independentes. A entrega de premios finais terá lugar ás 22:45 horas na Alameda.
A concelleira de Deportes, Sandra González, destacou que esta carreira é “unha homenaxe a un dos seus promotores e pioneiros do atletismo noiés, Hipólito Rey ‘Polo’. A relevancia da súa figura nos inicios marcou para sempre a historia deportiva da nosa vila, e non hai mellor maneira de recordalo que continuando co seu legado e alimentando a paixón por este deporte”.
As inscricións xa están abertas e poden tramitarse en liña ata o luns 25 de agosto. A participación é gratuíta para as categorías Sub 18, mentres que para as persoas adultas o custo é de 10 euros.
