A parroquia de Palmeira inaugurou este sábado a súa XI Festa do Polbo cun pregón da artista local Teresa Argibay, quen puxo en valor a tradición mariñeira, cultural e gastronómica da vila. Definiu Palmeira como “balcón da ría, terra e mar” e como unha “vila acolledora, farturenta, traballadora, empática, conciliadora e universal”.
No seu discurso, Argibay salientou o polbo como produto estrela da gastronomía galega, símbolo de unión e identidade. Ademais, lembrou o seu peso económico e cultural, desde o sostemento do emprego na pesca artesanal e na hostalaría ata a súa presenza na arte e na tradición popular.
O pregón concluíu cun chamamento á festa e á convivencia: “Palmeirenses, a festa empezou: música, maestro! Tentoso, polbeiro! Comede ben e bebede mellor, pero con sentidiño!”.
Pola súa parte, o alcalde de Ribeira, Luís Pérez Barral, destacou que esta celebración “é unha cita gastronómica xa consolidada en Galicia, que serve para dinamizar a parroquia e poñer en valor os produtos do mar”. O rexedor anunciou que este ano se servirán preto dunha tonelada de polbo, preparado polo recoñecido polbeiro Manuel Veloso, ademais doutras opcións gastronómicas como empanadas, mexillóns ou churrasco, todo a prezos populares.
A festa, que se prolongará durante toda a xornada, inclúe tamén programación musical e actividades pensadas para veciños e visitantes, coa intención de converter Palmeira nun espazo de encontro e celebración arredor do mellor sabor do mar.
