Este mércores 6 de agosto pola mañá tivo lugar no porto da Pobra do Caramiñal a presentación da III Bandeira Barbanza Arousa da liga ACT que se celebrará o vindeiro sábado día 9 de agosto.
Nesta presentación participaron as autoridades representantes do territorio; o presidente da mancomunidade e alcalde de Rianxo, Julián Bustelo; o alcalde da Pobra do Caramiñal, José Carlos Vidal; o alcalde de Ribeira Luis Pérez Barral e o concelleiro de deportes do Concello de Boiro, Marcos Fajardo.
Así mesmo, fixeron acto de presenza o representante da Liga ACT, Daniel Vázquez, a xerente da Mancomunidade Barbanza Arousa, Fátima Cachafeiro, e máis María Jesús García, coordinadora de Institucións de Caixabank como patrocinadores do evento.
O evento deportivo dará inicio ás 17:20h coa regata feminina na que participan oito equipos e a continuación celebrarase a regata de categoría masculina coa participación de doce equipos.
O evento é de absoluta relevancia para o territorio, tal e como destacou Julián Bustelo. Nas súas palabras “somos un territorio cunha profunda tradición marítima e de vida ligadas ao mar”. O alcalde da Pobra do Caramiñal engadiu que “este próximo sábado será unha festa do remo, pero tamén unha oportunidade para poñer en valor o noso patrimonio marítimo, noso porto, nosa historia e nosa entidade como vila vencellada ao mar”
A Bandeira Barbanza Arousa celebrouse o pasado ano 2024 en Aguiño (Ribeira) e por primeira vez no ano 2021 no concello de Rianxo.
