A nova edición da Feiriña de Outes, a VI Feira de Comercio Local de Outes, arrinca este sábado 16 de agosto e estará activa até o día seguinte, domingo 17 de agosto, na rúa da Capela. Será novamente unha cita co comercio de proximidade e cos produtos da nosa terra. Haberá produtos (principalmente) de gastronomía, produtos locais e artesanía, aínda que tamén cultura (libros), téxtil, maquinaria agrícola, coidados e saúde ou hostalería. Segundo puidemos saber, o programa vén con mancheas de actividades e arrinca este sábado ás 11.30 cunha sesión se ioga en familia (na praza do Bosque, impartida por Alma Henko).
Logo haberá un obradoiro de macerado de herbas (ás 12h na carpa diante da capela, a cargo de O Voo da Árbore), un obradoiro infantil de creación e construción (a carpa da praza do Bosque, da man de Doce Coliño), unha sesión vermú con Dos en Punto (na carpa a partir das 14h), un obradoiro sobre elaboración de xabóns (no Centro Social ás 17.00 horas, a cargo de Sapo Verde), un taller sobre como elaborar incensos artesanais (ás 18h no Centro Social, impartido por Luah Botánica Natural), un espectáculo para a rapazada (ás 19h da man de Patty Diphusa, na praza do Bosque) e un obradoiro sobre a muller a Lúa (no Centro Social ás 19h, impartido por Sara Willisch). Polo serán, a partir das 20h, haberá concertos con D’Palique e As Lens.
O domingo arrincará con obradoiros infantís: de xabóns (ás 11h no Centro Social), de estampado floral (ás 11.30 na carpa) e de pintura e debuxo (ás 12.00 na praza do Bosque). Logo celebrarase outro espectáculo para a rapazada: 10 anos percorrendo camiños de Os Monifates, ás 12.30 na carpa. Ás 13.00 horas haberá unha ruada con Jaitas Blues e 13.30 un obradoiro sobre plantas comestíbeis, na carpa. A axenda rematará cunha sesión vermú a cargo de La Disquetera.
A Feiriña vén da man do Concello de Outes e encádrase no seu obxectivo de dinamizar a economía local poñendo o foco no comercio de proximidade e coa intención de fomentar o produto local.
