O presidente honorífico de ACTEMSA, don Severino Escurís Batalla, recibirá este venres 5 de xullo un recoñecemento ao mérito empresarial e cidadán nun acto impulsado polo Concello da Pobra do Caramiñal e a Asociación de Empresarios AEPuebla, en colaboración coa Deputación da Coruña. A homenaxe terá lugar no Teatro-Cinema Elma a partir das 20.00 horas, e contará con alta representación institucional, nun acto aberto á cidadanía co obxectivo de distinguir e agradecer a vocación de don Severino coa creación da riqueza e o emprego no Barbanza e, por extensión, en toda Galicia, coincidindo co mes do seu centenario.
No acto está prevista a presencial do alcalde da Pobra, José Carlos Vidal, representantes de toda a Corporación municipal, o presidente de AEPuebla José Antonio Vidal Fabri, o presidente da Deputación da Coruña, Valentín González Formoso, o director xeral de Pesca, Acuicultura e Innovación Cándido Rial, a subdelegada do Goberno na Coruña María Rivas, o presidente da CEG Juan M. Vieites, o vicepresidente da CEC José Villarnovo ou a secretaria xeral da Cámara de Comercio de Santiago, ademais de familiares, empresarios e traballadores/as de ACTEMSA.
Traxectoria dun empresario centenario
Don Severino Escurís naceu o 18 de xullo de 1925 en Rianxo e trasládase á Pobra do Caramiñal aos catorce anos; incorporándose á conserveira Escurís recentemente fundada polo seu pai aos dezasete anos. Foi nomeado como presidente do consello de administración en 1979 e ao xubilarse crea ACTEMSA cos seus fillos en 1994 aos 69 anos, inaugurando o polígono da Tomada en Pobra do Caramiñal.
Recibiu os recoñecementos do Goberno de España, coa Medalla ao Mérito do Traballo en 2014, da Cámara de Comercio e dos seus compañeiros empresarios, de cuxas organizacións sempre foi partícipe, como de ANFACO, coa distinción á súa traxectoria empresarial concedida este mesmo ano. Ademais, a conserveira Escurís foi recoñecida coa Medalla da Xunta de Galicia en 1991. Foi tamén distinguido hai unhas semanas pola Deputación da Coruña nos Premios PEL.
