Este sábado San Xaquín e Santa Ana, as Rías Baixas e a comarca de Santiago vivirán unha fin de semana marcada pola estabilidade atmosférica. Esta situación mantén o ceo pouco nubrado ou despexado durante boa parte da xornada, agás a aparición de bancos de néboa matinais no interior e brétemas costeiras ao final do día na metade norte.
En Santiago e o interior das Rías Baixas, poderán rexistrarse néboas illadas nas primeiras horas, que desaparecerán co avance da mañá. Na zona costeira, especialmente en puntos como nas rías de Arousa e Muros-Noia nas que non se descarta tamén a formación de brétemas ao anoitecer.
As temperaturas manteranse agradables, con mínimas sen grandes cambios e máximas en lixeiro ascenso, podendo superar os 28 ºC en Santiago e por riba dos 30 nas rías e comarca.
Os ventos do nordés soprarán con intensidade moderada, aumentando ao longo da tarde, sobre todo en zonas expostas como o litoral da Costa da Morte e a entrada da ría de Muros e Noia, onde se agardan rachas fortes, especialmente en Fisterra.
O noso mar: Vento do norte á mañá e á tarde e do norte á noite, forza 4 a 5 á mañá, 4 a 6 á tarde e 5 a 6 á noite. Forte marusía. Visibilidade boa. Mar de fondo do noroeste, con ondas de 1 a 2 metros á mañá e á noite e 1.5 a 2.5 metros á tarde.
