O Concello de Ribeira continúa a aplicar medidas de consolidación financeira co obxectivo de reducir a súa débeda municipal. O pleno ordinario do mes de xullo aprobou este luns un crédito extraordinario por valor de 1 millón de euros, destinado á amortización anticipada de préstamos bancarios incluídos nos investimentos do orzamento de 2024.
A medida saíu adiante cos 11 votos a favor dos grupos do Goberno (BNG, PBBI e PSdeG) e 10 abstencións do Partido Popular (PP).
Segundo explicou o alcalde, Luis Pérez Barral, esta acción permitirá baixar o nivel de endebedamento do 47,6 % ao 44 % a finais de ano, o que supón un alivio significativo no pagamento de xuros. O rexedor salientou que non se trata dun fin en si mesmo, senón dun paso necesario para liberar recursos e destinalos a necesidades prioritarias como saneamentos, pavimentacións ou mellora de servizos básicos.
A concelleira de Facenda, Herminia Pouso, detallou que o Concello conta cun remanente de tesourería dispoñible de 4,8 millóns de euros, tras utilizar parte do superávit en créditos extraordinarios e suplementos de crédito. A normativa obriga a utilizar parte dese remanente para amortizar débeda, polo que a proposta cumpre tamén cos requisitos legais vixentes.
A concelleira Antía Alberte valorou positivamente esta decisión, lembrando que o novo goberno local atopouse cunha débeda acumulada de máis de 13 millóns de euros e que nos primeiros 100 días foi necesario facer fronte ao pagamento dun millón de euros por facturas pendentes de exercicios anteriores.
