Ocorreu nas rochas do embarcadoiro do peirao de Touro. O rapaz foi evacuado en lancha da Cruz Vermella ata o porto e trasladado ao Hospital do Barbanza
Un mozo foi rescatado esta tarde por mar tras sufrir unha caída nunha zona de rochas de difícil acceso no concello de Ribeira. O ferido, que quedou atrapado nun lugar de complicada chegada por terra, foi finalmente rescatado polos Bombeiros e evacuado en lancha pola Cruz Vermella ata o porto da localidade. Desde alí, foi trasladado en ambulancia ao Hospital do Barbanza.
O aviso foi recibido no 112 Galicia poucos minutos despois das 19:00 horas, cando un particular alertou da caída dun menor nas rochas dunha praia e asegurou que, nese momento, xa non o tiña á vista, o que activou todos os protocolos de emerxencia.
Desde o Centro Integrado de Atención ás Emerxencias, púxose en marcha un amplo operativo de busca e rescate, no que participaron efectivos de Urxencias Sanitarias de Galicia-061, os Bombeiros e GAEM de Ribeira, os Bombeiros de Boiro, e axentes da Policía Nacional e Local. Tamén foron alertados Salvamento Marítimo, o Servizo de Gardacostas de Galicia e os voluntarios de Protección Civil.
Unha vez no lugar, os equipos confirmaron que o mozo non caera ao mar, pero permanecía atrapado nunha zona de rochas de difícil acceso terrestre. O rescate realizouse finalmente por mar, e foi trasladado a salvo nunha embarcación da Cruz Vermella.
