Coristanco converteuse este 15 de xullo no escenario de posta de largo de Saudade, o evento da Deputación que reuniu a 13 chefs de todo o ámbito estatal con máis de 20 estrelas Michelín para poñer en valor o sector agroalimentario local. Segunda e última xornada que pon o foco nos produtos locais da horta, protagonizada por máis dunha quincena de produtores, e na que se desenvolveron actividades como visitas á finca, degustacións, mesas redondas, encontro cos produtores e intercambios de experiencias.
Os recoñecidos chefs Alberto Chicote, Diego Guerrero, Paco Morales, Aitor Arregi, Maca de Castro, Begoña Rodrigo, Andoni Luis Aduriz, Toño Pérez e os galegos Javi Olleros, Xosé Cannas, Manuel Costiña, Lucía Freitas e Pepe Solla foron os participantes deste evento, acompañados durante a xornada deste martes 15 de xullo do vicepresidente, Xosé Regueira; os alcaldes de Coristanco, Juan Carlos García; de Carballo, Evencio Ferrero; da Laracha, José Manuel López Varela; de Cabana, José Muíño; a alcaldesa de Boimorto, María Jesús Novo, e a concelleira de Vimianzo, María José Pose.
Regueira sinalou que, con Saudade, “queremos dar as grazas e recoñecer a todas as persoas do sector agroalimentario que traballaron intensamente e nos trouxeron ata aquí”, así como “celebrar o momento doce do noso sector de produción de alimentos” e, “por suposto, falar de futuro.
Chegaba o autobús cos participantes a Coristanco para comezar o día paseando pola finca da Despensa d’Lujo e coñecer o detalle dos procesos de cultivo sostible. Posteriormente, o equipo dirixiuse á carpa de Saudade onde estaban instalados os postos dos produtores locais A Conserveira, Bonilla a la Vista, Cafés Lúa, Chichalovers, Cienporcel Abastos, Empanadas Costumes Galicia, Empanadas Ternura, Galmesán, A Despensa D`Lujo, Mariscos de Barallobre, Orixes Galegas Porco Celta, Pagos de Brigante, Percebe da Barca Muxía, Vermú Lodeiros e Xearte Brigitte, onde degustaron os seus produtos.
O ambiente foise caldeando entre a diversidade de olores dos produtos e do entorno, ata que deron comezo as mesas redondas. A primeira delas sobre Raíces sostibles: Produto, Territorio e Cultura Alimentaria, na que participaron o chef Paco Morales e a chef Lucía Freitas, o divulgador científico José Miguel Mulet, e Lucía Calvo, da Despensa D’Lujo. E, a segunda e última, Facer País: Innovación, Sustentabilidade e Paisaxe Emociona’, cos chefs Maca de Castro, Andoni Luis Aduriz e Xosé Cannas, a xornalista gastronómica Lakshmi Aguirre, e Senén Barral, responsábel do Departamento de Innovación, Infraestruturas e Servizos de Restauración de Inditex.
Remata así esta primeira edición de Saudade, un proxecto que pasou por Santa Comba; Santiago de Compostela; A Pobra do Caramiñal; Ribeira e Coristanco, deseñado, en palabras da Deputación da Coruña, “para resaltar a excelencia e diversidade dos produtos locais, e que brindou aos participantes a oportunidade de vivir unha experiencia sensorial única, permitíndolles conectarse coa orixe e a elaboración de cada ingrediente”.
