O ucraíno afincado en Galicia Platon Kuzmenko proclamouse este domingo primeiro campión galego de Wingfoil, tras manterse como líder da clasificación xeral nunha xornada final sen vento suficiente para disputar novas probas.
A competición, organizada polo Real Club Náutico de Portosín por delegación da Real Federación Galega de Vela, non puido completar ningunha manga o domingo debido á baixa intensidade do vento, que apenas acadou os 4-6 nós, moi por debaixo do mínimo de 12 necesario para desenvolver a regata.
Así, prevaleceron os resultados da primeira xornada, na que se completaron cinco mangas grazas a condicións de vento máis estables. Kuzmenko selou a vitoria con tres primeiros postos, un segundo e un cuarto posto descartado, sumando así o seu primeiro título nesta disciplina emerxente da vela.
Completaron o podio Anton Kuzmenko, tamén ucraíno e baixo licenza do Real Club Náutico da Coruña, con 8 puntos; e Nicolás Blanco, do Club Náutico Castrelo de Miño, cun total de 17 puntos, os mesmos que Tomás Vieito, do Rodeira de Cangas, que quedou cuarto. Na quinta posición rematou o olímpico Iago López Marra, representando ao club anfitrión, cun punto máis.
A entrega de premios celebrouse ás 14:00 horas no Salón Nobre do Real Club Náutico de Portosín, coa presenza de representantes institucionais como Manuel Villaverde, presidente da Real Federación Galega de Vela; Carlos Lorenzo, concelleiro de Deportes do Concello de Porto do Son; Luís Otero, director deportivo; Isaac Gaciño, patrón maior da Confraría de Pescadores de Portosín; e Miguel Reboreda, comodoro da entidade organizadora.
O campionato contou co patrocinio da Deputación da Coruña e da empresa Gadis, marcando un fito na historia da vela galega ao ser o primeiro certame autonómico oficial da modalidade de Wingfoil.
