Amicos e a conserveira Pan do Mar organizaron esta semana unha recollida de residuos mariños na praia das Sinas, en Vilanova de Arousa. Na xornada participaron axentes medioambientais e traballadores da asociación do Barbanza.
Ao longo da mañá, grazas ao traballo conxunto dos voluntarios e voluntarias que se congregaron no areal vilanovés, recolléronse un total de 76,1 quilos de residuos. Deles, 2,5 quilos foron de plásticos, 72,5 de resto 1 de vidro, 0,1 de papel e case 200 cabichas.
Se ben a mañá comezou coa limpeza da costa, tamén se realizou unha acción de sensibilización mediambiental conducida polos activistas medioambientais de Amicos. Esta consistiu na pesada e clasificación de todo o material recollido, o que permite visibilizar a variedade de lixo
que chega aos nosos mares.
Pedro Lois, portavoz de Pan do Mar, destacou que esta colaboración constante con Amicos “combina coidado do mar, sensibilización medioambiental das xeracións máis novas e a inclusión das persoas con discapacidade. Aspectos que nos preocupan e polos que traballamos de forma continua dende Pan do Mar”.
Miguel Beiro, responsábel da área de Alianzas con Persoas e Empresas de Amicos, agradeceu aos voluntarios o seu traballo, e destacou que “no que vai de ano, recollemos case 3,5 toneladas de residuos en distintas accións de limpeza mariña. Aliados como Pan do Mar son importantísimos para o coidado e a preservación do medio ambiente, posto que o seu impacto positivo a nivel social é incalculábel”.
