A vila de Padrón viviu unha fin de semana de celebracións multitudinarias con motivo das festas do Santiaguiño do Monte, uns dos días grandes do calendario local. O 25 de xullo, milleiros de persoas participaron na tradicional procesión e na romaría no monte San Gregorio, onde o Concello repartiu máis de 1.500 racións de sardiñas con bolo preñado, cachelos e broa de millo.
A imaxe do Apóstolo Santiago, coñecido como o “Parrandeiro”, estivo acompañada na procesión por outras seis imaxes relixiosas, todas levadas a ombros por veciños e veciñas e movidas ao ritmo da música tradicional polas rúas do casco histórico. Este ano, destacou a participación feminina no traslado de San Xoán do Raio, a cargo de catro mozas que, como o resto, non pararon de bailar durante todo o percorrido.
Un dos momentos máis emotivos foi a subida da imaxe do Apóstolo polas 132 escaleiras ata a capela do Santiaguiño, a cargo dos irmáns Cajaraville e Beiró. A romaría posterior contou con música popular, xogos infantís e xantares compartidos entre amigos e familias, que ateigaron o monte con carpas, mesas e moita festa.
O alcalde, Anxo Arca, destacou “a gran participación de padroneses, visitantes e mesmo peregrinos”, subliñando que “o Santiaguiño goza de boa saúde, temos o monte ateigado de xente nun día no que ata os santos bailan”.
Éxito rotundo do derbi asnal
Outro dos actos destacados foi o tradicional Derbi Asnal, celebrado o sábado no paseo do Espolón e organizado pola Asociación do Burro Fariñeiro (Abufa). Con 19 burros e 23 participantes, a carreira foi un éxito de público e desenvolveuse con absoluto respecto polos animais, segundo asegurou o alcalde.
Sergio Freire con Dinamita proclamouse vencedor na modalidade de montados, seguido por Antonio Aradas e Andrés Pérez. Os mesmos corredores repetiron podio na categoría con burro á man. A proba contou con participantes chegados de Madrid, Sevilla e Ciudad Real.
Sobre a enquisa cidadá que o Concello prevé facer para decidir o futuro desta proba, Anxo Arca sinalou que “se fará igualmente, pero tendo en conta a masiva asistencia deste ano, pensamos que a resposta está clara”.
