A Lonxa Vella de Ribeira acolleu este martes 1 de xullo a entrega oficial dunha dorna doada á real e Ilustre Confraría da Dorna por Andrés “O Chopo” e restaurada pola Unidade de Condutas Aditivas (UCA) do Concello de Ribeira.
No acto participaron o alcalde, Luís Pérez, o concelleiro de Sanidade, Juan Luis Furones, o concelleiro de Mar, Fernando Abraldes,o coordinador da Escola de Vela Tradicional da Confraría da Dorna, Anxo García, o coordinador de actividades da UCA, Manuel Casais, o doante da Dorna, Andrés “O Chopo”, directivos da Confraría da Dorna e máis os verdadeiros artífices da restauración: o alumnado da UCA.
Anxo García felicitou ao Concello, a Manolo e ao equipo de alumnos do obradoiro de madeira da UCA o seu traballo. “Grazas por axudarnos a cumprir un dos obxectivos da Confraría da Dorna que é, manter o noso patrimonio marítimo que suma coa restauración desta dorna chamada Chopa e que estaba en moi mal estado. Deixárona impecábel”.
O responsábel do obradoiro de madeira, Manuel Casais, agradeceu que o Concello “pensara en nós, a verdade é que estamos moi contentos co labor que estamos facendo”. Casais comentou que foi un traballo moi duro porque a dorna estaba moi deteriorada pero conseguiron deixala en moi bo estado. Rematou cunha gabanza ao alumnado do obradoiro pola súa implicación e dedicación: “Que eles sintan que se están a recuperar co seu traballo á comunidade”.
O concelleiro de Sanidade e responsábel da UCA, Luis Furones, manifestou que isto “é unha mostra máis do bo facer do alumnos do obradoiro da UCA”. Furones afirmou que moitas veces o seu traballo “queda no escurantismo ou pode pensarse que só é un servizo onde se dispensa medicación”. O concelleiro falou de aproveitar estas oportunidades para dar a coñecer as contribucións do obradoiro.
Pola súa banda, o alcalde, Luís Pérez Barral, puxo en valor o duro traballo de varios meses que o alumnado fixo para “recuperar un elemento que forma parte do patrimonio marítimo de Ribeira”. Segundo Pérez Barral, grazas a esta restauración preservamos unha embarcación tradicional que poderán desfrutar as xeracións presentes e futuras. O alcalde, Luís Pérez Barral, tamén salientou que actuacións coma esta “encaixan de cheo na liña de acción do Goberno local, que busca poñer en valor a historia, a cultura e, moi especialmente, o patrimonio marítimo do noso concello, porque entendemos que é un sinal de identidade que temos a obriga de protexer e difundir”. Tamén tivo palabras de agradecemento para a Confraría da Dorna “porque non só organiza a festa que nunha semanas estaremos desfrutando, senón que desenvolven un traballo fundamental na conservación e divulgación do patrimonio marítimo, nomeadamente todo o relacionado coa dorna”.
Pérez Barral engadiu que xunto a esta dorna e outras da Confraría “imos poder gozar nuns poucos días, dese XVII Encontro de Embarcacións Tradicionais de Galicia que acollerá Ribeira entre o 17 e o 20 de xullo”.
Rematou facendo unha alegación a favor da dorna: “Este tipo de embarcacións deron de comer a moitas familias durante moitos anos e agora queremos que siga sendo unha referencia viva do noso concello”.
