O Concello de Boiro vén de adquirir novas axudas técnicas para o préstamo a familias usuarias do Servizo de Axuda no Fogar con persoas dependentes ao seu cargo. Estas novas adquisicións, por un importe de 10.000 euros, súmanse ás adquiriras nos últimos anos ascendendo o investimento total aos 33.860 euros.
O réxime de préstamo destas axudas conta cunha longa traxectoria no municipio, superando as 40 axudas técnicas das que dispón o Concello de Boiro e que se poñen a disposición das persoas usuarias.
Os Servizos Sociais comunitarios de Boiro contan cun catálogo de axudas técnicas para o seu préstamo como son colchóns antiescaras para persoas acamadas, camas articuladas e grúas para persoas con servizo SAF para familias e persoas que precisan deste servizo.
O alcalde, José Ramón Romero, e o concelleiro de Política Social, Raúl Treus, recibiron na mañá deste 2 de xullo as novas axudas técnicas adquiridas que, nos vindeiros días, serán levadas ás vivendas que así o solicitaron e que se atopan en lista de agarda.
