A influencia do anticiclón situado ao norte dos Azores seguirá marcando o tempo nas Rías Baixas e na comarca de Santiago durante os vindeiros días. A situación traerá estabilidade atmosférica, con ceos xeralmente pouco nubrados ou despexados.
Porén, no terzo norte de Galicia, agárdanse nubes baixas, especialmente durante as primeiras e derradeiras horas do día, que poderán cubrir parcialmente o ceo na capital galega.
As temperaturas manteranse sen cambios significativos, con valores agradables tanto de día como de noite(26-33 graos). Non se esperan nin subas nin baixadas destacables.
O vento soprará do nordés con intensidade moderada, pero poderá acadar refachos fortes ao longo do litoral atlántico, especialmente nas zonas máis expostas das Rías Baixas.
A situación meteorolóxica responde á estabilidade típica do verán baixo o dominio do anticiclón dos Azores, que segue impedindo a entrada de sistemas frontais pola fachada atlántica.
O noso mar: Vento do nordés á mañá e á noite e do norte á tarde, forza 4 a 5 á mañá e 4 a 6 á tarde e á noite. Forte marusía. Visibilidade boa. Mar de fondo do noroeste á mañá e norte á tarde e á noite, con ondas de 0.5 a 1.5 metros á mañá, 1 a 2 metros á tarde e 1.5 a 2.5 metros á noite.
