As atraccións das festas de verán de Ribeira contan xa co visto bo para a súa instalación, despois de que Portos de Galicia aceptase a proposta presentada polo Concello. Deste xeito, queda desbloqueada unha das principais incógnitas da celebración, garantindo a presenza dunha das ofertas máis demandadas polo público familiar.
A proposta do Concello incluía a reorganización dos espazos portuarios para compatibilizar o uso lúdico co mantemento das actividades portuarias e comerciais, e foi finalmente validada por Portos tras analizar as condicións de seguridade e accesibilidade.
Con esta autorización, o municipio avanza na preparación das Festas de agosto, cuxo programa definitivo será presentado nuns días. O goberno local celebra a resolución favorable e destaca o esforzo de coordinación entre administracións para manter viva unha parte esencial das festas populares de Ribeira.
